Asier Illarramendiren irudia aukeratua izan da bere jaioterria garbi mantentzea bultzatzeko egin duten kanpainarako. Real Madrileko jokalariak ez du une batez ere dudatu eta bere burua komiki dibertigarri honetan agertzeari baietzkoa eman dio mutrikuar guztiek herri txiki bezain polit honetako kaleak garbi manten dezaten.

Komiki hau Asier eta Cosme Damian Churruca y Elorza zientzilari, marinel, militar eta herriko alkate izan zenaren arteko elkarrizketa bat da. Egunerokotasunean herriko plazan aurkitzen den bere estatuak bizitza hartuko du komiki honetan eta bien artean, herritarrek Mutriku garbi mantentzea dute helburu.

Kanpaina honen bidez, herritarron laguntza eta konpromisua eskatzen dute maite dugun Mutriku garbi mantentzeko. Herriko umeetatik hasi eta nagusietaraino guztiok zerbait egin dezakegula argi utziz, guztiok ikas dezakegula besteengandik.

"Mutrikuko kaleak txukuntzen dituzten langileen eguneroko lana alperrikakoa izaten da askotan. Zapaltzen ditugun lurrak zabortegia dirudi, hormak ez ditugu txukun mantentzen, txakur kaka edonon aurki dezakegu...".

Maite duguna zaintzea eta mantentzea kostatu egiten da, horregatik dei hau egin die herritarrei herria gustatzen zaien bezala eta merezi bezala mantentzeko. Hau guztia triptiko baten bidez banatu dute herri osoan zehar udaletxeko langileek "guztion esku: Mutriku garbi" lemapean.