Zaleek Real Madrileko jokalariei eginiko harrera ikusita gau ahaztezin baten aurrean geundela susmatzen genuen eta hala izan zen. Partidua amaitzear zegoela iritsi zen Real Madrili finalerdietarako txartela eman zion gola.

Ancelottik, Sergio Ramos jarri zuen zelai erdian Kroosekin batera eta indar handiz hasi zuten partidua etxekoek. Chicharitok eta Cristiano Ronaldok markagailua estreinatzeko aukera izan zuten ordu laurdena bete aurretik baina ez ziren Oblak gainditzeko gai izan.

Lehenengo zatia amaitu aurretik beste hainbat aukera izan zituzten txuriek baina ezin izan zuten oso erne ibili zen Oblak gainditzea lortu.

Bigarren zatiak ildo beretik jarraitu zuen. Real Madrilek garaipenaren gola nahi zuen kosta ala kosta baina Atleticok ez zuen amore ematen. 75. minutuan, jokalari bat gutxiagorekin gelditu zen Cholo Simeoneren taldea eta ezin hobeto aprobetxatu zuten merengeek. Izan ere, 87. minutuan garaipenaren gola iritsi baitzen Chicharitoren eskutik.

Real Madrid finalerdietan da dagoeneko, aurreko lau denboraldietan bezala. Hurrengo arerioa, Bartzelona, Bayern edota Juventus.

- Partiduko fitxa:

Real Madrid: Casillas; Carvajal, Pepe, Varane, Coentrao (Arbeloa 91.min); James, Ramos, Kroos, Isco (Illarra 92.min); Chicharito (Jesé 92.min) eta Cristiano.

Atlético de Madrid: Oblak; Juanfran, Miranda, Godín, Gámez; Tiago (Giménez 85.min), Koke, Saúl (Gabi 46.min); Arda, Mandzukic eta Griezmann (Raúl García 65.min).

Txartelak: Turan 30.min eta 75.min, Raúl García 73.min, Pepe 74.min, Arbeloa 92.min, Koke 93.min.

Golak: 1-0 (87.min) Chicharito.