Asier Illarramendi pozik azaldu zen Malagaren aurka lortutako garaipenaren ostean. 32 minutu jokatu zituen eta 3-1ekoarekin amaitu zen partidua. Bale eta Modricek zelai utzi beharra izan zuten minez eta mutrikuarrak prest dagoela gogorarazi zuen.

"Ez zuten oso aurpegi ona baina probak egin arte ez dakigu zenbaterainokoak izan daitezkeen lesioen larritasunak. Bi jokalariak oso garrantzitsuak dira guretzat eta espero dugu ezer larririk ez edukitzea. Ni jokatzeko prest nago eta nire beharra badute hor egongo naiz. Topera entrenatzen naiz egunero horretarako".

Partiduari buruz, kanpoko taldearen kalitatea azpimarratu zuen: "Lehenengo zatian asko kostatu zaigu arriskua sortzea eta bigarren gola sartu arren ez digute gauzak erraz jarri. Oso ondo jokatzen dute futbolean".

Asteazkenean jokatuko dute Santiago Bernabeun Txapeldunen Ligako bueltako partidua, Atleticoren aurka hain zuzen ere: "Lehenengo zatian gol-aukera asko izan genituen baina ez genuen golik egitea lortu. Hala ere, etxeko partidua irabaztea espero dugu zaleen laguntzarekin. Lortutako emaitza nahiko arriskutsua da, atea hutsean mantentzea izango da helburua".

Azkenik, taldean jarraitu nahi duela argi utzi zuen: "Kontratua dut hemen eta oso gustura nago. Aurreko urtean taldera egokitzea kostatu zitzaidan baina orain oso gustura nago taldekideekin eta baita hirian ere. Hemen jarraitzea gustatuko litzaidake".