Real Madrilek ez du hutsik egiten eta Malagaren aurkako garaipenarekin lau dira jarraian lortutakoak. Ramos, James eta Cristiano Ronaldoren golei esker mendean hartzea lortu zuten Javi Graciaren taldea eta dagoeneko Txapeldunen Ligan dute burua madrildarrek. Asier Illarramendi bigarren zatian zelairatu zen min hartu zuen Modricen lekua hartuz.

Partidua hasi eta berehala zelaia utzi beharra izan zuen Balek eta Chicharitok hartu zuen honen lekua. Hortik gutxira, 24. minutuan hain zuzen ere, etxeko taldearen lehenengo gola iritsi zen. Cristiano Ronaldok ateratako falta jaurtiketa Sergio Ramosek aprobetxatu zuen baloia sareetara bidaltzeko. Jarraian 2-0ekoa lortzeko aukera garbia izan zuten baina oraingoan oso erne ibili zen Kameni Jamesen jaurtiketa desbideratuz.

Etxeko taldeak ez zuen zorterik eta lehenengo zatian Balek min hartu bazuen oraingo honetan Modric izan zen aldageletarako bidea hartu zuena minez. Illarra izan zen kroaziarraren lekua hartu zuena 60. minutuan.

66. minutuan etxeko taldearen alde penaltia adierazi zuen Vicandi Garrido epaileak baina portugaldarrak ezin izan zuen Kameni gainditu. Hala ere, hortik hiru minutura iritsi zen Real Madrilen bigarrena. Kamenik ezin izan zuen Jamesen jartiketa aldendu eta sare barruan bukatu zuen baloiak.

Bigarren gola jaso eta jarraian, markagailuko aldea murriztea lortu zuen kanpoko taldean, Juanmiren eskutik. Dena den, Ancelottiren mutilak ez ziren kikildu eta partidua bukatzear zegoela hirugarrena egitea lortu zuten. Cristiano Ronaldoren golari esker 3-1 amaitu zen partidua. Aurretik, hil ala biziko sei partidu.

- Partiduko fitxa:

Real Madrid: Casillas; Arbeloa (Carvajal, 76.min), Pepe, Sergio Ramos, Marcelo; Kroos, Modric (Illarramendi, 60.min), Isco; James, Bale (Chicharito, 4.min) eta Cristiano Ronaldo.

Malaga: Kameni; Rosales, Angeleri, Sergio Sánchez, Boka; Amrabat, Darder (Duda, 87.min), Recio (Tissone, 75.min), Castillejo (Horta, 83.min); Samu García eta Juanmi.

Golak: 1-0, 24.min: Sergio Ramos. 2-0, 69.min: James. 2-1, 71.min: Juanmi. 3-1, 91.min: Cristiano Ronaldo.

Epailea: Iñaki Vicandi Garrido. Txartelak: Arbeloa (61.min) eta Kroos (82.min) Real Madrilen aldetik; Recio (42.min), Sergio Sánchez (77.min) eta Tissone (86.min) Malagaren aldetik.